«Хаҥалас түмэлигэр өй күрэҕэ: Сахаквиз оонньуу ситиһиилээхтик ааста»

Быйылгы Култуура сылыгар уонна төрөөбүт тыл, сурук-бичик күнүгэр сөп түбэһиннэрэн, олунньу 18 күнүгэр Хаҥалас улууһун түмэлин дьиэтигэр Покровскай куорат биэс тэрилтэлэрин үлэһиттэрин кыттыылаах «Сахаквиз» интеллектуальнай оонньуу ситиһиилээхтик буолан ааста.

Бу өй күрэҕэ биһиги төрөөбүт тылбыт баайын, саха норуотун историятын, култууратын, үгэстэрин билиилэрин тургутан көрдө. Покровскай куорат араас тэрилтэлэриттэн биэс хамаанда кэлэн, бэйэлэрин билиилэрин, сатабылларын көрдөрдүлэр: «Кырсаада» Покровскай уопсай үөрэх 3 №-дээх орто оскуолатын хамаандата, «Илгэ» Хаҥалас оройуоннааҕы үөрэх управлениетын хамаандата, «Харысхал» Хаҥалас улууһун нэһилиэнньэҕэ уонна үлэҕэ социальнай көмүскэлин управлениетын хамаандата, «ҺӨҔҮҤ» Хаҥалас улууһа МО администрациятын хамандаата, «Кэрэни кэрэхсээччилэр» Култуура уонна духуобунай сайдыы управлениетын хамандаата.  

Тэрээһин олус кэрэхсэбиллээх уонна тыҥааһыннаах буолла. Кыттааччылар араас боппуруостарга хоруйдаан, саха тылын уонна култууратын дириҥ билиилэрин көрдөрдүлэр. Оонньуу 5 түһүмэхтэн турбута. Сөптөөх хоруй 1 баал бэриллибитэ.

Оонньуу түмүгүнэн муҥур кыайыылаах аатын «ҺӨҔҮҤ» Хаҥалас улууһа МО администрациятын хамандаата сүктэ. Сүрүн бириис үс тыһыынча уу харчынан. Хамаанда салайааччыта – Егор Варламов, «Хаҥалас улууһа» МО баһылыгын бастакы солбуйааччыта, бирииһи түмэл дириэктэригэр Елизавета Мартыноваҕа, олохтоох көҕүлээһиннэри өйүүр программа чэрчитинэн түмэл тиэргэнигэр тупсаҕай эйгэ (арт-объектар, скульптуралар) оҥоһуллалларыгар диэн туттаран, соһуччу үөрүү үксээтэ.  

Маннык тэрээһиннэр дьону билиигэ-көрүүгэ тардар, саха тылын уонна култууратын сайыннарар аналлаахтар.

Хаҥалас түмэлэ мантан ыла өрүү маннык өй оонньууларын тэрилтэлэргэ анаан ыытыа турдаҕа. Көхтөөх кыттыыны ыларгытыгар ыҥырабыт!