«Серго Орджоникидзе түмэл-дьиэтигэр өй күрэҕэ: Музейный квиз оонньуу ситиһиилээхтик ааста»

Быйылгы Култуура сылыгар уонна Саха Өрөспүүбүлүкэтин күнүгэр сөп түбэһиннэрэн, муус устар 22 күнүгэр Серго Орджоникидзе түмэл-дьиэтигэр Покровскай куорат үс тэрилтэлэрин үлэһиттэрин кыттыылаах «Музейный квиз» интеллектуальнай оонньуу ситиһиилээхтик буолан ааста.

Бу өй күрэҕэ биһиги төрөөбүт тылбыт баайын, саха норуотун историятын, култууратын, үгэстэрин билиилэрин тургутан көрдө. Покровскай куорат араас тэрилтэлэриттэн үс хамаанда кэлэн, бэйэлэрин билиилэрин, сатабылларын көрдөрдүлэр: «Дьулуур» кыраайы үөрэтээччилэр, бэтэрээннэр хамаандалара, «Илгэ» Хаҥалас оройуоннааҕы үөрэх управлениетын хамаандата, «Харысхал» Хаҥалас улууһун нэһилиэнньэҕэ уонна үлэҕэ социальнай көмүскэлин управлениетын хамаандата.

Тэрээһин олус кэрэхсэбиллээх уонна тыҥааһыннаах буолла. Кыттааччылар араас боппуруостарга хоруйдаан дириҥ билиилэрин көрдөрдүлэр.

Оонньуу түмүгүнэн муҥур кыайыылаах аатын «Харысхал» Хаҥалас улууһун нэһилиэнньэҕэ уонна үлэҕэ социальнай көмүскэлин управлениетын хамаандата сүктэ. Сүрүн бириис быһыытынан Өксөкүлээх Өлөксөй «Письмо якутской интеллигенции» кинигэтэ туттарылынна.

Маннык тэрээһиннэр дьону билиигэ-көрүүгэ тардар, саха тылын уонна култууратын сайыннарар аналлаахтар.

Хаҥалас түмэлэ өссө да маннык өй оонньууларын тэрилтэлэргэ анаан ыытыа турдаҕа. Көхтөөх кыттыыны ыларгытыгар ыҥырабыт!