Хаҥалас дьоно – «Төлкө» роман геройдара.

Николай Якутский «Төлкө» романын иккис кинигэтигэр Сүөдэрдээх Маайа Тайҕаҕа кэлэн, олох араас эрэйин-муҥун көрсөллөр. Сүөдэри, бириискэлэргэ мас кэрдэр киһини, саха баай тойоно Байбал Тиэхэнэп атыҥырыыр, күргүйдүүр. Сүөдэр дьолугар Уйбаан Уоһукабыс диэн Байбал Тиэхэнэп суруксута, төрдө Нам улууһун киһитэ, баар буолар. Кини сылгыһыт Сүөдэри биир дойдулааҕын курдук көрөн, мас үлэтигэр ыларга, олохтуурга Тиэхэнэби кытта кэпсэтэр. Сылгыһыт Сүөдэр бу киһиэхэ сүрдээҕин махтана саныыр. Мин кыра эрдэхпинэ аҕам оҕонньор бу кинигэни бастакы тахсыытын улахан дьоҥҥо уонна оҕолорго, киэһэ аайы кыра-кыралаан ааҕарын өйдүүбүн. Дьон кэрэхсээн истэрэ. Онно аҕам сэһэҥҥэ суруллар Уйбаан Уоһукабыс кини төрөөбүт таайа, оттон Байбал Тиэхэнэп төрдө Нөмүгү киһитэ буоларын ахтан кэпсиирэ. Онон Уйбаан Уоһукабыс прототибынан буолбут эбит урукку Арҕаа-Хаҥалас улууһугар, Эргис нэһилиэгэр төрөөбүт Иван Тимофеевич Осипов диэн киһи. Кини оччотооҕу кэминэн ыллахха, үөрэхтээх, улууһугар уонна да атын тэрилтэлэргэ баайдарга суруксуттаабыт, айбакааттаабыт, кыра дьон үҥсүүтүн туруорсар, кэлбит-барбыт киһи эбит.